GoGo Blog

Орны гудас хийх талаар

http://tsetsgeehandmade.blog.gogo.mn — Sun, 13 May 2012 17:02:21 ULAT

Гэр зуураа хийх үйл урлалтай чинь холбоотойгоор ор дэрний хэрэглэл хийх цурвал зөвөлгөө болон заавар оруулахаар боллоо. Та нар минь дагаад хийгээд байгаарай. Эхлээд орон дээрээ юу тавьдаг билээ тэрнээс л эхлэе:)

Гудас

Охин маань томроод тусдаа унтах болсон тул ахын орон доор унтах болох нь тэр. Ах бол ер нь ороо бараг ашиглаагүй дээ. Харин дүү дуртай нь аргаггүй унтаад байгаа. Ингээд орыг нь охиндоо зориулж өөрчилж сайжруулах хэрэгтэй болсон юм.

Эхлээд гудас хийсэн. Хийлгүүлсэн пүрштэй гудас нь доороос нь нухмаар овон товонтой лав л би байсан бол тухтай унтана гэж бодогдохгүй байсан тул хуучин одеяль буюу хөнжилөө давхарлаад өнгөлж гудас болгосон. Манайхан пүрштэй гудсаа яагаад ийм муу хийдэг юм болоо. Тэр тусмаа хүүхдэд зориулсан юм хийж байгаа байж:( Урьд нь даавуу олон давхарлаад л аргалж байсан юм.

Давхарлах гудас хийхдээ хөнжилөө хооронд нь залгах хэрэг гарвал захаар нь нийлүүлж байгаад зиг заг оёдол ашиглаарай. Зузаан зүйлийг залгахад хамгийн тохиромжтой оёдол юм шүү. Дараа нь гудасныхаа захыг эмжиж өгвөл бүр цэвэрхэн харагдах болно.

Эцэст нь гудсаа гадуур нь даавуугаар өнгөлөөрэй. Өнгөлөхдөө хэмжээгээр нь даавуугаа эсгэж оёод доод талыг нь оёолгүй үлдээж байгаад гудсаа хийгээд гараараа битүүлээд оёчихоорой.

Давхарлах гудсаа пүрштэй гудсандаа хөдөлгөөнгүй байлгахын тулд дөрвөн буланд нь өргөн резин барьж оёсон. Үүнийг өнгөө оёхдоо завсараар хавчуулж оёно.

Давхарлага гудсаа пүрштэй гудсандаа резинээр нь углан тогтооно.

Хуучин хөнжилөөрөө гудас хийх гэж байгаа бол хэмжээгээ яг тааруулж биш жаахан тавиу авч хийгээрэй. Би яг тааруулаад хийчихсэн чинь гудас маань бараг л 4- хуруу багадсан байна лээ:P Хавж болон залгаж оёх үед шингэсэн бололтой. Сониноос энэ хөнжил миний нялх үеийн гадуур өлгий байсан юм. Одоо ингээд хүүхдийн орны гудас болчихлоо. Гаднах даавуу нь хүртэл нээх зөөлхөн одоо хүртэл байдаг. Үйл үртэс хүртэл хүний дурсамжийг хадгалж бас баяжуулж байх юм даа:)

Дурсамж дүүрэн үйл уран байг.

Хумбага хийх заавар

http://tsetsgeehandmade.blog.gogo.mn — Wed, 9 May 2012 20:08:03 ULAT

Та нартаа амалсан ёсоороо хумбага хийх заавраа оруулж байна. Уг нь аль дээр оруулах гээд зааврынхаа зургыг авчихсан байсан ч эргээд олдохгүй байсан юм. Тэгээд саяхан хамаг багцагаа ухаж байж олж аваад бөөн баяр сууж байна.

Хумбага бол 18-с 19-р зууны үеийн Англи улсад анх үүсэн бөгөөд анх Балжингарам /хамба шарилж/ цэцгийн нэрээр нэрлэгдэж байснаа хожим 1930-д оны үеэс еөү-еөү нэрээр нэрлэгдэх болсон.

Харин бид шууд орчуулахгүй хэрэглэх нь буруу тул (зарим буруу дуудсан үед өвчин зовлон гэж байгаа юм шиг л сонсогдоно хэхэ) үүсэл гарал болон хийгдэх арга барилд нь тулгуурлан хумбага гэж нэрших нь зүйтэй юм. Монголчуудын эртнээс ахуй хэрэглээндээ өргөнөөр хэрэглэдэг нэг төрлийн хумигдсан амтай бөндгөрдүү хомбого савтай тун төстэй бөгөөд хумбагыг хийхдээ заавал хумиж хийдэг хумигдсан үедээ яг л хомбого савтай адилхан харагддаг юм. Хомбого = Хумбага (хумиж хийдэг гэсэн санааг давхар агуулсан) Өөрөөр хэлбэл бид хомбого хэлбэрийн зүйлийг хумиж хавтгайлан дарсанаар энэхүү хумбага үүсэж байгаа юм.

Хумбага хийхэд танд даавууны өөдөс байсан ч хангалттай. Эхлээд даавуун дээрээ зурагт үзүүлсэнээр дугуй дүрс зур. Дугуй зурахдаа гарт дайралдсан дугуй хэлбэртэй бүхнийг ашиглаж болно:)

Зурсан дугуй дүрсээ тойруулан хайчил:)

Хайчилсан даавууны захыг дотор талруу нь 4-5 см нуглангаа тойруулан нэг үзүүрийг нь зангидсан утас зүү аваад шидэж эхэл.

Утасны нөгөө зангидсан үзүүр хүртэл даавуугаа тойруулан шидсэн бол нөгөө зангилаан дээрээ нэг тааруулан хатгаад утсаа татаж чангал.

Нөгөө хомбого хэлбэрийн уут үүсэж байгаа биз.

Одоо уут хэлбэрийн зүйлийнхээ амсарыг ёроол руу нь голлуулан доош нь дараад утсаа чангалан зангидаад тасал. Чиний гарт голдоо хумигдсан дугуй хэлбэрийн даавуу харагдаж байна уу:)

Чи сурчихлаа. Энэ бол хумбага. Та түүнийг хүссэн хэмжээгээр, хүссэн өнгөөр, хүссэн даавуугаар хийгээрэй. Хэмжээний хувьд хумбага нь анх таны зурсан дүрс хоёр дахин багассан байдлаар үүсдэг.

Та тэднээр гоёж гангалж, чимэглэж бас хооронд залгаж зүйгээд ер нь бол яаж л бол яаж хэрэглэж болно. Хэрвээ залгах гэж байгаа бол зүгээр л нэг хоёр хатгаасаар ирмэг хооронд нь тогтоогоод ард нь утсаа цэвэрхэн зангидаад болоо.

Хумбага хий, хумбагаар тогло:D

Маш их БАЯРЛАЛАА:)

http://tsetsgeehandmade.blog.gogo.mn — Mon, 7 May 2012 14:51:07 ULAT

Хүн гэдэг сэтгэлийн амьтан. Хэн нэгэнд итгэл өгөх, урам зоригыг нь сэргээх, шинэ хүсэл мөрөөдөлд хөтлөх, урмын сайхан үг сонсох, чин сэтгэлээсээ нэгэндээ туслах, туслуулах гээд л энэ бүхэнд тэрхүү сэтгэл гээч нь хөөрөн догдолж дахиад юу ч байсан хиймээр болж, тэр сайхан мэдрэмжийг дахин дахин мэдрэхийг хүсдэг. Сэтгэлийн сайхан үгсийг бид өдөр бүр сонсоод байж чаддагүй ч сонсох бүрдээ өөртөө улам итгэлтэй болж эрч хүчийг мэдэрдэг болов уу. Бараг өдөр бүр л ойр дотныхон найз нөхдөөсөө ч сонсож байгаагүй тийм гоё үгсийг хэн нэгэн надад зориулан блог дээр маань үлдээсэн байдаг. Заримдаа баярласандаа болоод очоод тэврээд авмаар тийм гайхалтай үгсийг та нар надад бэлэглэдэг юм шүү. Би сэтгэл хөдлөлд дуртай түүнийгээ ч нуухыг хүсдэггүй. Сэтгэл хөдөлсөн үе гэдэг бол надад аз жаргал байдаг. Тэгэхээр та нар минь надад аз жаргал бэлэглэдэг юм шүү.

Гэнэтийн бэлэг гэсэн бичлэг дээрх хүмүүсийн сэтгэгдэл надад нэгийг бодогдуулсан. Юуг гээч! Би та бүхэндээ зориулж илүү ихийг хийх ёстой юм байнаа гэж, одоо хийж байгаа маань үнэхээр чамлалтай байна. Би улам илүү хичээх болноо. Яагаад би заавал бүх заавраа өөрөө гаргаж өөрийнхөөрөө цагаа үрэн байж хийдэг вэ гэхээр энэ цахим орон зайд урлалтай холбоотой Монгол хүний хийсэн заавар зөвөлгөө байгаасай бид гадныханаас илүү юу гэхээс дутахгүй шүү гэдгийг л харуулахыг зорьж ингэж хичээдэг юм. Бид бусдаас суралцах хэрэгтэй бүр маш сайн. Хамгийн гол нь эргээд бүх зүйлийг чи өөрийн болгохдоо өөрийнхөөрөө байж бүр илүүг бүтээх ёстой гэж бас боддог. Хэрвээ та бүхэн миний нэгэн адил блог нээхээр төлөвлөж байгаа бол заавар, зураг, бүтээл зэргээ аль болох өөрөө хийх гэж хичээж байгаарай. Тэгвэл энэхүү урлал маань жинхэнэ утгаараа хөгжихид та хувь нэмрээ оруулж байгаа гэсэн үг юм шүү. Хамтаа хичээж орчин цагийн урлалыг жинхэнэ утгаар нь хөгжүүлээрэй. Та нартаа маш их баярлалаа.

Батир-н амжилт, Макү-н урам зориг, Үнэн үг-н гэртээ урлалын булантай болсон явдал, Уугий-н дуртай зүйлдээ цаг гаргах болсон нь, Можко-н шинэ блог, шинэ мэдрэмж, Болороо-н эсгүүрийн сургалтанд бүртгүүлсэн явдал, Лилэ-н оёдлын машин авах гэж байгаа нь, гээд л ямар гоё юм бэ үүү үүү:D, би та нараар хачин их бахархаж байна. Та нар үнэхээр мундаг шүү. Та нартаа улам их амжилт, аз жаргалыг хүсье.

Сэтгэгдэл үлдээсэн бүх хүндээ л бэлэг өгмөөр байна. Гэхдээ тэгэх боломжгүй болохоор удахгүй хумбагыг хэрхэн гараараа хийх заавраа оруулнаа. Харин энэ олон сэтгэгдэлүүдээс заавал нэгийг сонго гэвэл...

Удахгүй 3-дахь хөөрхөн үрээ гаргах гэж байгаа, гэртээ хүүхдээ харангаа дуртай зүйлээ хийж буй тэр нэгэн мундаг ээж Уугий-д өгмөөр санагдлаа. Миний цахим шуудангийн хаяг tsetsgeee@yahoo.com -руу утасны дугаараа явуулаарай.

Би ч ялгаагүй анх дуртай юмандаа цаг гаргаж сураагүй өөрөө хичээдэггүй байхдаа гэрийн ажил хүүхэд гээд бүх юманд түүртээд л нэг бол нээх их ажлаа барахгүй хүн нэг бол нээх их зүгээр цагаа өнгөрөөж байгаадаа бухимдсан хүн байдаг байлаа. Гэвч миний дуртай зүйл маань намайг шинэ амьдралд дагуулж шинэ хүсэл мөрөөдөлтэй болгож намайг өөрийгөө олж аван танихад тусалсан юм. Би одоо амьдралдаа сэтгэл хангалуун өөртөө итгэлтэй урам зориг дүүрэн амьдрах болсон. Амьдрал дандаа сайхан байддаггүй. Саад бэрхшээл, тааламжгүй зүйл дүүрэн байдаг ч тэр бүхэнд миний хайртай дуртай бүх зүйл маань намайг түшин бат зогсож байдаг болохоор саадыг би дахин нэг юмны эхлэл гэж, бэрхшээлийг би шинэ боломж болгож харахыг хичээдэг. За за хэтэрхий их биччихлээ. Ёстой уучлаарай. Та нарын гоё сэтгэгдэлүүдээс болж байгаа юм:P

Хөөх энэ миний 100 дахь бичлэг байна шдээ, сая л мэдлээ. Ямар сонин бас гоё тохиолдол вэ. Маш их билэгшээв:)

Би та нараар бахархаж байна:) Хайртай шүү:-*

Гэнэтийн бэлэг

http://tsetsgeehandmade.blog.gogo.mn — Thu, 3 May 2012 11:28:06 ULAT

За энэ бол нөгөө 1000 дахь сэтгэгдэлийн эзэндээ өгөх бэлэг маань очих ёстой эзэндээ очилгүй өөр хэн нэгэн хэрэгтэй хүнд очих гээд хүлээж байгаа нь энэ. Жулиа маань надад олдохгүй хоёр завгүй хүн учраа олохгүй байсаар байтал бэлэг маань бэлэг биш болох гээд болдоггүй. Мэдээж Жулиадаа тохирох шагналыг нь өгнө. Өөрөөр хэлбэл өөрт нь таалагдах болов уу гээд H&M-н хүзүүний зүүлт захиж авчируулж байгаа. Жулиа надруу ярьж байгаад ирээд бэлгээ авчихаарай:)

Харин энэ хумбага хийгчээ үнэхээр авахыг хүссэн бас гоё сэтгэл хөдөлгөм сэтгэгдэл үлдээсэн хүнд зүгээр л бэлгэлчихэе:) Нэг хүн нэг л сэтгэгдэлийг зөвхөн энэ бичлэгийн доор үлдээнэ! Сэтгэгдэл авах эцсийн хугацаа 5-р сарын 7 12 цаг хүртэл үргэлжилнэ. Та нартаа амжилт хүсье:D Сэтгэгдэлээ үлдээгээрэй.

Миний хувьд дахиж тодорхой тоон дээр азтан гэж сэтгэгдэл шалгаруулж байхаа болихоор шийдсэн. Хэрвээ тэгэхээр бол зарлахгүйгээр зүгээр л гэнэт хэлж байвал гоё юм уу гэж бодлоо.

Амжилт хүсье!

Цаасан бөм бөм хийх арга

http://tsetsgeehandmade.blog.gogo.mn — Sun, 29 Apr 2012 11:36:03 ULAT

Өө яаж байнаа:( Нэг бичлэгээ 2 дахин бичдэг байна шдээ. Ядаж байхад ихийг хэлэх үү. Гөүгөү маань ингээд гацаад биднийгээ илүү цагаар суулгаад байдаг юм аа:'(

Зааж өгөхөөр төлөвлөсөн зүйлсийн жагсаалтанд цаасан бөм бөм ороод бас л нэлээд удсан байна. Миний бичлэг оруулах хурдаар бол та нарынхаа урмыг хугалахаар удаан байдаг. Нэг бичлэг оруулах гэж өдрийн хагас заримдаа бараг 2 өдөртэй тэнцэх ажил болдог болохоор үнэндээ амжихгүй юм. Хажууд байгаа хоёр зулзагаа анхаарах, өөр бусад ажлаа амжуулах хэрэгтэй байдаг, болдогсон бол энэ нэг биеэ 10-р үржүүлэх юмсан ккк:)) Нэг нь хүүхдүүдээ хараад бас хамтдаа тоглоод л, нэг нь ажлаа хийгээд л, нэг нь юмаа оёод л, нэг нь Blog-оо хөтөлж бичлэг шахаад л, нэг нь гэрээ цэвэрлэж тохижуулаад л, нэг нь дэлгүүр хэсэж найзуудтайгаа уулзаад л, нэг нь гоо сайхандаа анхаарч иллэгт орж үсээ засуулаад л, нэг нь юм уншиж тархиа цэнэглээд л, нэг нь нээх гоё хоолнууд хийгээд л, нэг нь зүгээр л юу ч хийхгүй зурагт үзэж сайхан амарч унтмаар байна өө:))

Цаасан бөм бөм хэрхэн хийхийг зааж өгөөч гэж хүмүүс их хүсдэг юм. Тэгээд цаг зав гарган цаасааар бөм бөм хийх аргаа оруулж байна.

Жич: Бөм бөм нь анх Францад үүсэн бөгөөд малгайны оройд чимэглэл маягаар хэрэглэгддэг байсан байна. Улмаар бөм бөм нь хөгжөөн дэмжигч багын гартаа барин бүжиглэдэг хэрэгсэл болжээ. Бөм бөм нь ихэвчлэн хувцас болон ахуйд чимэглэлийн зүйлээр хэрэглэгддэг юм. Өдгөө зөвхөн ийм төрлийн цаасан бөм бөмийг хийдэг компани хүртэл байдаг бөгөөд аливаа баяр цэнгүүний хамгийн ганган чимэглэл болсоор байгаа.

Мэдээж өөрийн орны нөхцөлд тохируулан хамгийн амархан олдож болох хямдхан зүйлээр хийж үзсэн юм. Энэ бол амны цаасан алчуураар хийсэн бөм бөм.

Хэрэгтэй зүйл:

- Амны цаасан алчуур дан өнгийн (Хамгийн багадаа 3-5-н ширхэг амны алчуураар нэг том бөм бөм хийнэ.) Би энэ заавар дээр жаахан товчлоод 3-р хийж үзүүлсэн байгаа 4 юмуу 5-р хийвэл илүү гоё болно шүү.

- Хайч

- Төмөр болон бусад төрлийн утас (талхны ам боочихсон байдаг гялгар шар төмөр утас ашигласан)

1. Цаасан алчуураа дэлгэж тавиад нэг талаас нь сөөлжүүлэн яг л дэвүүр хийж байгаа юм шигээр нугална.

2. Дараа дараагийн цаасаа мөн л адилхан нугална. Нуглаасаа тараачихгүйн тулд бичгийн хавчаараар түр тогтоогоорой.

3. Бүх нугалсан цаасаа давхарла.

4. Голын цэгээс нь ухаж өнцөг үүсгэн хоёр талаас нь хайчилна. Ингэж хайчилахгүй байсан ч болно шүү.

5. Голоор нь утсаар сайтар ороон зангидна.

6. Нугалаас бүрийн үзүүрийг давхарлаж байгаад үзүүрлэн хайчилна.

7. Цаасаа нэг бүрчлэн салгаж дэлгэнэ.

8. За дуусчихлаа:)

Цаасан бөм бөмийг та аливаа баяр ёслолын чимэглэл болгон хэрэглэж болохоос гадна гэрийнхээ тохижилтонд ч гэсэн ашиглаж болно шүү.

Танд таалагдсан гэдэгт илгэлтэй байна.

Бөм бөм урла, бөм бөмөөр чимэглэ.

Нөхөөс

http://tsetsgeehandmade.blog.gogo.mn — Sat, 21 Apr 2012 14:32:59 ULAT

Би нөхөөст дуртай. Нөхчихсөн зүйл нэг л хөөрхөн харагдаад байдаг юм. Ялангуяа хүүхдүүдийнхээ өмдийг болж л өгвөл нөхөж өгдөг. Мэдээж зүгээр нэг нөхөөс биш зөвхөн тэр цоорхойд тохирсон онцгой нөхөөс тавихыг хүсдэг. Сүүлийн үед ялангуяа тохойны нөхөөс хувцас загварт их анзаарагдах болсон байна лээ. Эмээ маань цоорхой зүйлийг тэвчдэггүй хүн байж билээ. Онгойж явахаар умайж яв гэж хэлээд л уранхай цоорхойгоо нөхөж суудагсан. Өөрийнхөө хийсэн нөхөөсүүдийнхээ зургыг орууллаа:)

Хүүгийн маань жийнсний нөхөөс. Ард талын халаасны бичгээс нь санаа аван хийсэн. Би Лондонд хайртай.

Хийж өгсөн гэрийн өмдний нөхөөс. Таван хошуу. Энэ нөхөөс нь цоорчихоор нь дээрээс нь дахиад нэг жижиг таван хошуу тавьчихсан чинь бүр хөөрхөн харагдаж байна лээ.

Энэ өмдийг санаж байгаа биз дээ. Хайрын баярын өдрөөр нөхөж өгсөн:)

Хөл бөмбөг гэдэг нөхөөс. Бас л гэрийн өмд. Мөлхөөд л бай, ураад л бай ээж нь оёод л байя хүү минь.

Охин маань ерөөсөө өмдний өвдөгөө урдаггүй юм. Хэрвээ тийм бол бүр гоёор нөхөхгүй юу.

Харин энэ бол энэ бичлэгт зориулж тусгайлан хийсэн НӨХӨӨС гэдэг зүүний хатгуур. Зүүний хатгуур хийх дуртай болохоор дуртай зүйлсээ нэгтгэв:)

Та нартаа бяцхан бэлэг болгож зурагт зааврыг орууллаа. Хараад ойлгомжтой тул тайлбар хэрэггүй болов уу.

За ингээд энэ нөхөөстэй бичлэгээ дуусгая. Гэхдээ миний нөхөх үйл дуусахгүй байх өө:))

Нөхөөстэй урлал!

Охиныхоо даашинзыг нэгээр нэмчихлээ

http://tsetsgeehandmade.blog.gogo.mn — Wed, 11 Apr 2012 10:36:32 ULAT

Охиндоо нэг даашинз бараг л 15 минутанд хийчихлээ. Яаж вэ, гэж үү. Өмсдөггүй майк-аа л өөрчилсөн юм. Хэрэг болохгүй байлгаж байхаар хөөрхөн охиноо гангалчихлаа. Иймэрхүү хувцасыг даашинз болгоход хэтэрхий амархан болохоор ахиад өөр өмсдөггүй эсвэл загвар нь хуучирсан юм юу байна гэж хайж үзсэн чинь бас нэлээд хэдэн өөрчилчихмөөр юмнууд байнаа байна. За тэр яахав хялбархан заавартай хөөрхөн даашинзаа хэрхэн бүтсэн талаар тайлбарлая.

Эхлээд майк дээрээ охиныхоо яг таардаг даашинзыг тавьж байгаад суганых нь хэмжээг харандаагаар тэмдэглэ. Дараа нь тэмдэглээс дээгүүрээ оёод илүү хэсгээ хайчил.

Болчихлоо. Амархан байгаа биз. Харин одоо хэдэн хөөрхөн өнгө тохирох товч юм уу шүрээр хүссэн хэсгээр нь чимэглэчих. За дуусчихлаа.

Зун болж байгаа юм чинь охиндоо даашинз авч өгөх л байх. Гэхдээ өөрөө хийсэн эсвэл өөрчилсөн хэдэн даашинзаар тоог нь нэмчихвэл таны охин хамгийн ганган нь.

Үйл уран байг.

Сайхан

http://tsetsgeehandmade.blog.gogo.mn — Sat, 7 Apr 2012 23:24:19 ULAT

Энэ бичлэгээ зүгээр л САЙХАН гэж нэрлэмээр байна. Өнөөдөр миний хувьд их сайхан өдөр байлаа. ''SunShine''-хаа зохион явуулсан My style 2 -д оролцоод бэлэг бэлгийн дээд сайхан номоор шагнуулсандаа, мөн үнэхээр гайхалтай сайхан бас үзэсгэлэнтэй бүсгүйтэй дотно танилцаж сайхан яриа өрнүүлсэндээ үнэхээр их баяртай сайхан байна.

Бас болоогүй ээ зохиогчийн дурсгалын үг, гарын үсэгтэй гээд боддоо. Яагаад ч юм энэ номыг авах гэж байгаад л хойшлуулчихаад байсан юм. Гэтэл ийм сайхан бэлэг болон хүрч ирсэнд нь ихэд билэгшээж байгаа.

Ингээд хэд хоног ширээн дээр хэвтсэн хэдэн хэсэг зүйлсээ нээх урам зоригтойгоор дуусгачихлаа.

Дахиад л уулзахыг хүсэх тийм сайхан хүмүүс байдаг даа. Чи тийм сайхан.

Хүсэл мөрөөдөл чинь үргэлж биелэж байг.

Баярлалаа SunShine.

Эх хэл минь

http://tsetsgeehandmade.blog.gogo.mn — Fri, 6 Apr 2012 17:50:03 ULAT

Огт хөндлөн нэг бичлэг оруулчихая:) Бидэнд заримдаа хийж байгаа ажил мэргэжилээсээ болоод шинээр орж ирж буй гадаад үгийг эх хэлрүүгээ зөв буулгах хэрэгцээ их гардаг билээ. Энэ ч үүднээс саяхан нээгдсэн Монгол хэлээ аваръя гэсэн нэр бүхий Facebook-д нэгдсэн юм. Надад үнэхээр их таалагдаж байгаа болохоор та бүхнийг бас эх хэлээ аврах их үйлсд нэгдээрэй гэж уриалж байна. Бид харь хэлийг сайн мэддэг байж болно харин эх хэлээ төгс мэддэг байх хэрэгтэй. Хүн насан туршдаа суралцдаг нь үнэн юм бол эх хэлээ ч гэсэн улам сайн мэдэж баяжуулж хайрлан хамгаалж байх нь бидний үүрэг. Зүгээр л хичээхэд л болох юм. Орос хэлтэй нэлээдгүй хутгалдсан монгол хэл маань Англи хэлэнд бараг дагаар орох гээд байгаа энэ цаг мөчид бид сонор сэрэмжтэй байх хэрэгтэй. Магадгүй таны ч гэсэн ажил мэргэжилийн онцлогоос болоод харь үгсийг шууд авч хэрэглэх гээд байвал эсвэл танд оносон сайхан монгол үг байвал энэ Facebook-д нэгдэж өөрийн хувь нэмрээ оруулаарай.

Тухайн Facebook хуудасны гол зорилго болон та яаж нэгдэх зааврыг ийшээ орж үзээрэй.

Мөн Монгол хэлээ аваръя -с иш татсан сануулга үгс:

- Улс орны хөгжлийг даган англи үгс хэт богино хугацаанд олноороо орж ирсэнээс үүдэн бид англи хэлэнд монгол хэлээ бараг дагаар оруулахад хүрэх гээд байгаа. Энэ чигээрээ явбал хэрэглэж байгаа үгсийн тань 90 гаран хувь нь англи болох магадлал бий. Жишээ нь, драмын театрын билетын кассанд оочерлов, одоо ч ингэж ярьдаг байх аа, орос хэл ингэж чадсан байхад англи хэл үүнийг хэд нугалж чадахаар болчихлоо.

- Англи хэлэнд одоо бараг 3 сая үг байна, монгол хэлний 200 мянган үгтэй толь бидэнд бий билүү. Бидний ярианы үлдсэнийг харь үгс дүүргэхээр бид нар англиар ярих уу, монголоор ярих уу, бод доо

-Монгол хэл бол хятад, англи, орос гэх мэт хэлнүүдийн холимог юм гэж тэр эрдэмтэн мэргэд чинь удахгүй тодорхойлно доо. Монголчууд бусдын хийж, зохиож, бүтээж байгаагүйг бий болгоод ирэхээр аяндаа монгол үгс бас бусад хэлэнд зээлдэгдээд ирэх цаг үе ойрхон байгаа.

- Үг түүхийн явцад хувирдаг, гэхдээ голчлон өөр хэлэнд зээлдэгдээд, нэрлэсэн зүйл нь өөрчлөгдөөд, хүмүүс өөрчилж нэрлэхээр шийдээд гэх мэт шалтгаанаар. Үгийг "хөгжилд" нь даатгаж болно, угаасаа хөгжөөд хөгжөөд нэрлэсэнээ ч оноогүй үгс аль ч хэлэнд олон, харин хэлийг бусад хэлэнд дагаар ороход хүргэж болохгүй.

Энэ аянд идэвхтэй оролцоорой гэж Хэрэглээний урлал blog-c уриалж байна.

МОНГОЛ ХЭЛ

Чихний чимэг болсон аялгуу сайхан МОНГОЛ ХЭЛ

Чин зоригт өвгөд дээдсийн минь өв их эрдэнэ

Сонсох бүр яруу баялгийг гайхан баясч

Сод их билигт түмэн юүгээн бишрэн магтаму би!

Урьдын бэрх цагт улс МОНГОЛ-ын хэт заяаг

Уйтгарлан бодоход урам зоригийг минь сэргээсэн

Өөдлөн дэгжихийн төгс хувьтайд нь итгүүлсэн

Өрнөн мандахын шинж бүрдсэн өвгөдийн минь хэл!

Мөрөн гол цутгалант ширгэшгүй их далай мэт

Мөнхөд үр ач нарын залгамжаар бадранхан дэлгэрч

Хөндий цээжинд орогч бүгдийг нэвтрvvлэх чадалт

Хөгжим мэт яруу баясгалант МОНГОЛ ХЭЛ мину! ...

Билгүүн их номч Б. Ринчен

гэж нэгэнтээ шүлэглэж байсан хүний энэ сайхан шүлгийг олон ч удаа уншиж уралдаан тэмцээнд оролцож байсан хүүхэд насаа дурсахад сайхан байна. Өдгөө харь хэлэнд автаад байгаа эх хэлээ бид өөрийн чадахаараа аврах нь зөв билээ.

...Чихний чимэг болсон аялгуу сайхан Монгол хэл чинь

Чиний мэдэхгүй харь үгсээр дүүрээд ирэхийн цагт

Чигчийхэн чинээ үр чинь чамайг Daddy, Mommy гэж дуудвал

Чи хэнийг ч буруутгаж үл чадах вий

Сонсох бүр яруу баялгыг нь гайхан баясах эх хэл чинь

Солгой муруй харь хэлтэй хутгалдаад ирэхийн цагт

Сонор сэрэмжээ алдан эх хэлээ бузарласаны гайг

Согтуу юм шиг байсан өөрсдөөсөө эрээрэй

Хөгжим мэт яруу баясгалант Монгол хэл чинь

Хөөрхийлэлтэйгээр харийн хэлэнд уусахын цагт

Хэн болсоноо мэдэхгүй дэмий л амаа барих

Хойч үе минь биднийг өршөөхгүй байлгүй дээ... гэж чадан ядан өөрчилж бичлээ. Учир нь энэ шүлгэнд Монгол хэлийг маань хамгийн сайхнаар дүрсэлсэн байдаг. Харин ийм болгоод уншаад үзвэл танд нэгийг бодогдуулах бизээ.

Эх хэлээ хайрлая, хамгаалая.

Support me! For ''My Style 2''

http://tsetsgeehandmade.blog.gogo.mn — Wed, 28 Mar 2012 22:05:37 ULAT

Цаана чинь SUNShine маань гоё уралдаан зарласаныг мэдсэн л биз дээ. Блогчид маань оролцоод эхэлчихсэн байх тийм үү. Хувцас загварт дуртай болохоороо SUNShine - ны блогоор нь үргэлж зочилдог. Хувцас загвар, зөвөлгөө, урлаг соёлын тухай өргөн хүрээний мэдээллийн багтаасан үнэхээр сайхан блог шүү. Энэ удаагийн уралдаанд оролцоно гэж бодож явсаар хэд ч хоночихов. Бичлэгээ оруулж амжихгүй байсаар нэлээд удчихлаа.

Бага байхдаа өөртөө хувцас хийж өмсөх их дуртай байж билээ. Бас болоогүй ээ болж өгвөл өөрөө хийсэн гэдгээ мэдэгдүүлэхгүй гээд л (ичдэг байсан юм шиг байгаан) их л хичээдэг байж билээ. Загвар зохион бүтээгч болно гэж мөрөөдөж хүсдэг байсан ч тийм тохиромж бүрдэлгүй нэг л мэдэхэд хүсэл сонирхолоороо биш ашиг сонирхолоороо мэргэжилээ сонгочихсон юмдаг. Тэр мэргэжилээ сонгож, эзэмшихээр хүссэн цагаасаа эхлээд дуртай зүйлээ бараг мартаад бүхнийг тэр мэргэжилдээ зориулдаг байсан ч хүний дуртай зүйл хэзээ хойно ч гэсэн сайхан бүхнийг агуулан өөрт нь нуугдаж байдаг гэдгийг дахин олж нээсэндээ би одоо ч баяртай явдаг. Одоо бол өөртөө хувцас хийдэггүй л дээ бас л нөгөө муухай болчих вий гэсэн болгоомжиллоосоо болоод:Р Гэхдээ энэ уралдаанд өөрийнхөө хийсэн бүтээлээрээ оролцвол илүү гоё юм шиг санагдаад байна.

Жирэмсэн байх үедээ пальто өмсөх гэхээр таарах юм олдохгүй байхаар нь Урлах эрдмийн нэг сайн хийдэг гэгдсэн оюутанаар (нэрийг нь сайн санахгүй байна уучилаарай) энэ хүрмийг хийлгэсэн юм.

Илүү гарсан ноосон даавуугаа хадгалж байгаад бараг жилийн өмнө энэ юбкыг хийсэн юм. Тэгээд энэ бүтээлээрээ оролцохоор шийдлээ.

Уралдааны дүрэм маань нэг хувцасаа хэрхэн олон янзаар өмсөх болохоор миний хувьд өнгөөр тоглох хэрэгтэй л болох нь дээ:)) Улаан өнгө маань сонгодог хар цагаанаас гадна бусад өнгүүдтэй ч сайхан зохицдог шүү дээ. За эхэллээ шүү:

Улаан + хар

Улаан юбка дээрээ улаан богино ханцуйтай цамц хар хүрэм, хар өнгийн зүүлт, ээмэг, урт түрийтэй хар өнгийн гутал цүнх зэргийг хослууллаа.

Улаан + Цагаан

Улаан юбка дээрээ цагаан майк, цамц, сандаал зэргийг өмсөж бусад чимэглэлийн зүйлсийг зүүсэн.

Улаан + Хар

Улаан юбка дээрээ хар майк цамц, богино түрийтэй гутал, цүнх, улаан өнгийн зүүлт бугуйвч зэргийг нэмж өмссөн. Энэ хар өнгөтэй хослуулсан зургууд жаахан холилдсон байна лээ шүү уучлаарай:)

Улаан + Ногоон

Улаан юбка дээрээ ногоон цамц, майк, туфль, цүнх, улаан ногоон өнгө орсон ээмэг бугуйвч хослуулж үзлээ.

Дахиад л улаан + хар

Энэ удаад улаан юбка дээрээ хар өнгийн балерина, клач цүнх улаан өнгийн зүүлтүүдтэй хослуулж өмслөө.

Улаан + Шаргал

Улаан юбка дээрээ байгалийн шаргал өнгөтэй цамц, богино ханцуйтай хүрэм, сандал, зүүлт, улаан цүнх, алтлаг өнгийн ээмэг, бугуйвч зүүсэн.

Үсний зүүлтэнд дуртай болохоор бүх зохицолуудад зориулсан үсний зүүлтүүдийг өөрөө хийсэн. Нэлээд бэлдсэн, зураг авах бичлэг оруулах хоёр маань бараг л бүтэн өдрийн ажил болсон болохоор тэмцээнд оролцоно гэдэг том ажил юм аа. Хувцасны шүүгээ гоёлын хайрцаг хоёр маань бөмбөгдүүлсэн мэт л байлаа хэ хэ.

Таалагдсан бол намайг дэмжээрэй!!!!!!! Бас уралдаандаа идэвхтэй оролцоорой.

I love fashion!

Гал тогоо ба оёхуй. Цуврал 4

http://tsetsgeehandmade.blog.gogo.mn — Mon, 19 Mar 2012 10:57:28 ULAT

Гялгар уут хадгалагч.

Хүнс цуглуулах бүрд овоороод байдаг гялгар уутуудыг ингэж цэгцэлээд хэрэгтэй үед нь дахин ашиглаарай. Хүмүүс ингэж цэгцэлдэгийг хараад шууд л таалагдсан. Үнэхээр гэрт бүхэл бүтэн нэг шүүгээг эзэлээд байсан уутуудыг ингэж цэгцэлсэндээ их баяртай байгаа.

Дээр болон доороо онгорхой амсарт нь резин гүйлгээд дээд талд нь оосор оёод л болоо. Хэрэгтэй үедээ доороос нь татаад л авчихна.

Харин уутнуудаа ингээд эвхээд хийчихвэл ихийг багтаахын дээр авахад амар байх болно.

Том уутаа дээрээс нь жижиг уутаа доороос нь хийгээд байвал зүгээр юм билээ.

Бид гялгар уутнаас татгалзах ёстойгоо мэдсэн ч гэсэн хэрэглэсээр л байдаг. Байгальд хортой гэгддэг энэ уут дор хаяж 1000-н жил болж байж задардаг гэж сонссон. Тиймээс нэгэнт хэрэглээд байгаа учраас бид хэрхэн зөв зохистой хэрэглэх тал дээрээ анхаарах хэрэгтэй юм шигээ. Энэ талаар мэдээлэл хайж байгаад Номин их дэлгүүрийн гялгар уутан дээр байдаг бидний анзаардаггүй байж болох 9-н зөвлөмжийг олсон юм.

1. Эд зүйлс зөөвөрлөхөд, үүнд: ээлжийн хувцасаа хийх, өдрийн хоолоо хийж авч явах, аялал зугаалагаар явахдаа, Нүүхдээ эд зүйлсээ савлах, зөөлөвч болгон ашиглах

2. Дэлгүүрээр үйлчилүүлэх бүртээ

3. Цагаан идээ сэрвээхдээ

4. Мах махан бүтээгдэхүүнийг хөлдөөж хадгалахад

5. Эд зүйлс хатаалгүй хадгалахад

7. Цэцэг хөлдөхөөс сэргийлэхэд

8. Норж болзошгүй эд зүйлсийг хамгаалахаар хийх

9. Угаах хувцасаа хийх

Харин би бас ингэж хэрэглэдэг

+ Гадаа хадгалах гэж байгаа зүйлсээ тоос шорооноос хамгаалан гадуур нь гялгар уутанд хийх эсвэл дэлгэж зүйгээд бүрэхэд

+ Хогын савандаа уут болгож ашигладаг

+ Хүүхдийн хувцас, шинэ жилийн чимэглэл, гэх мэт ахуйн шинжтэй зүйлсийг ангилж хадгалахад

+ Бас гялгар уутаар хийдэг урлал хийж сурахаар төлөвлөөд байгаа. Сураад блогтоо заавар болгож оруулнаа:) Ер нь бол гялгар уутаар олон сонирхолтой зүйлс урладаг юм билээ.

Хүнс цуглуулсан болон дэлгүүрээс өгсөн уутаа та яаж ашигладаг вэ эсвэл шууд л хаячихдаг уу? Саналаа нэмэрлээрэй.

Энэ хүрээд миний галын өрөөндөө зориулж хийсэн энэ цуврал маань дууслаа. Сэтгэлд чинь хүрч, санаанд тань нийцэн галын өрөөгөө гоёхоор шийдсэн бол одоо эхлээрэй.

ГАРААР ХИЙСЭН = ГЭРТЭЭ ХИЙСЭН

Би оёх дуртай. Би урлах дуртай. Би хийсэн зүйлсээ хэрэглэх бүрдээ таашаал авдаг. Учир нь тэд миний гэрт, миний гараар, бидний төлөө бүтээгддэг юм:)

Дурлам урлал, урлам амьдрал минь, би чамд хайртай!

Гал тогоо ба оёхуй Цуврал 3

http://tsetsgeehandmade.blog.gogo.mn — Mon, 12 Mar 2012 17:13:09 ULAT

Гал тогоо ба оёхуй цуврал маань үргэлжилж байна. Энэ удаад ширээний бүтээлэг болон тавагны суурь хийснээ орууллаа.

Гараараа оёсон бүтээлэг бас тавагны сууриуд нь таны гэр бүлд дотно сайхан уур амьсгал бүрдүүлээд зогсохгүй гэрийн дотоод засалд чинь өнгө нэмэх болно. Учир нь та өөрөө хүссэнээрээ тохируулж хийж чадах билээ. Сандалын бүрээсийг бас нэлээд дээр үед оёсон юм байна. Зөөлөн үслэгдүү даавуугаар хийсэн болохоор суухад тухтай байдаг юм. Ганц гэм нь оёж байх үедээ гэрт маань цас орчихсон мэт, би өөрөө хун шувуу шиг болчихсоныг эс тооцвол хэ хэ.

Эдгээр тавагны сууриуд нь ширээний бүтээлэг амархан муухай болохоос хамгаалаад зогсохгүй чимэглэлийн зориулалттайгаар хэрэглэж болно.

Ингээд өөрийнхөө хийсэн бүтээл дээрээ хоолоо тавиад тавтай сайхан хооллоорой.

Үйл тань уран, Хоол тань амттай байг!

1000 дахь сэтгэгдэлийн Азтан тодорлоo!

http://tsetsgeehandmade.blog.gogo.mn — Sat, 3 Mar 2012 00:47:45 ULAT

За ингээд азтан маань маш ширүүн өрсөлдөөн дунд тодорлоо. Блогоо чат болохоос нь өмнө зосоох хэрэгтэй байх гэж бодлоо хэ хэ. Та нарын бүх сэтгэгдэлийг уншлаа бас хөгжилтэй байлаа. Мэдээгүй мөртлөө байнга ордог намайг дэмждэг адилхан сонирхолтой хүмүүс байсан гэдгийг үгүйсгэхгүй. Гэхдээ би хангалттай эрт хугацаанд зарласан гэж бодоод байгаа. Бичлэг бүрийнхээ доор сануулж байсан. Энэ удаад амжаагүй тэр хүмүүстээ дараа заавал азтан болоорой гэж үнэн сэтгэлээсээ хүсэж байна.

Олон зүйл нуршилгүй миний блогын 1000 сэтгэгдэлийн азтан бол:

.................................................................................................................................

Жулиа (хязгаарлах)

43 минутын өмнө

1000 дахь сэтгэгдэлийн эзэндээ өгөх бэлэг

Фионаа enkhzaya.blog.gogo.mn-энд бүтнээрээ биш ч гэсэн хэсэг нь гар урлал байгаа.

..................................................................................................................................

гэж бичсэн Жулиа чи байлаа. Энд бяцхан түүх хэлэхэд:

Жулиа анх блогоо нээж байх үед би байнга ордог бас сэтгэгдэлээ их үлдээдэг байж билээ. Тэр үед блог хэсэх завтай ч байж. Одоо ч үе үе ордог хэвээрээ. Хувцас загварын талаараа хамгийн их үзэх юмтай, бас их мэдрэмжтэй гоё блог хөтөлдөг шүү чи, чамд баяр хүргэе!

Илүү ихийг бүтээж, сэтгэж, хийгээрэй.

1000 дахь сэтгэгдэлийн эзэндээ өгөх бэлэг

http://tsetsgeehandmade.blog.gogo.mn — Fri, 2 Mar 2012 18:11:39 ULAT

Блогоор маань зочилж урмын сайхан үгсээ харамгүй зориулдаг олон хүмүүсийн сайхан сэтгэлээр миний блог тэжээгдэж тэтгэгддэг. Тийм болохоор тэр л хүмүүст бяцхан бэлэг болгож тэр дундаа өөртэйгээ ижил сонирхолтой хэн нэгнийг баярлуулах үүднээс энэ бэлгийг бэлдлээ.

Энэ бол хумбага хийгч. Хумбага бол энгийн хэрнээ хамгийн хөөрхөн урлал юм. Анх Англи улсад 1837-1901 оны үед үүсэж байсан. Хумбагаар олон зүйлийг урлаж чимэглэж болдог бөгөөд анх хараад л би түүнд дурлаж үргэлж хийдэг зүйлсийн нэг болсон. Харин түүнийг хамгийн хялбар бас төгс хийхэд энэ хэв танд туслах болно. Хэв маань хумбагыг хэрхэн хийх талаар өөрийн гэсэн маш дэлгэрэнгүй заавар болон хумбагаар өөр юу юу хийж болох талаар хэдэн санаануудын хамт танд очих болно. Таныг аз ивээг:) Бяцхан бэлэг маань жинхэнэ сонирхож байгаа хүндээ хүрнэ гэдэгт итгэлтэй байгаа. Ялагчаа блогоороо зарлана. Одоо таны сэтгэгдэл л үлдлээ.

Хумбагаар чимэглэгдсэн бүтээлүүдээс энд, энд бас энд бий.

Та ч бас түүнд дурлах болно. Таны урлах үйл улам дэлгэрэг.

Шинийн 3-ны бүтээл

http://tsetsgeehandmade.blog.gogo.mn — Tue, 28 Feb 2012 17:03:02 ULAT

Блогоор маань байнга зочилдог зарим нь Шинийн 3-ны бүтээл гэхээр бараг л ойлгож байгаа байх. Гэхдээ энэ жил хамаатныхаа хүүхдийн даахины найранд яваад бүтээлээ тэр өдөр нь дуусгаж амжаагүй. Ямартай ч амжиж эсгээд орхичихсон байсан юм.

Шүр бүрийг нэг бүрчлэн хатгаж оёсон болохоор цаг их орсон.

Би айлд орохоороо өөрийн эрхгүй бурхан тахилыг нь хараад байдаг юм. Заримдаа нэг мэдэхийн очиж мөргөөд хүрдийг нь эргүүлчихсээн зогсож байх. Хэдий тийм айхтар шүтлэггүй ч багаас дадаж зуршсан зан минь юм байлгүй дээ.

Эмээгийн бурхан тахилын өмнө байдаг энэ том хүрд хэдэн жилийн настайг би мэдэхгүй. Бүр жаахан байхдаа өргөж дийлдэггүй байснаа л санаж байна. Эргүүлэхээр нээх сайхан хүнгэнэж дуургардагт нь эмээ маань их дуртай байдагсан.

Хүрдэндээ суурь хийе гэж бодоод л хийчихлээ. Ийм зүйл ер нь байдаг эсэхийг мэдэхгүй л дээ. Гэхдээ байлгаж яагаад болохгүй гэж.

Ноднин жилийн бүтээлийг үзэхийг хүсвэл энд бий.

Ум ма ни бад мэ хум.

Гал тогоо ба оёхуй. Цуврал 2

http://tsetsgeehandmade.blog.gogo.mn — Sat, 18 Feb 2012 17:35:17 ULAT

Гал тогоондоо зориулж хийсэн дараагийн зүйл бол Хормогч.

Хийхэд ч амархан байх. Анх хөдөлмөрийн хичээл дээрээ хормогч оёхыг заалгаж байснаа дурсчихлаа. Нээх цагаан өнгийн даавуугаар хийж байсан юмдаг.

Хийсэн зүйл бүрээ жаахан ч гэсэн чимэглэж байгаарай. Ингэх нь танд илүү их таашаал сэтгэл ханамжийг төрүүлэх болно.

Эмэгтэй хүн гэртээ ч гэсэн цэвэрхэн хувцаслаж байхыг хүсдэг гэтэл хувцас маань цэвэрлэгээ хийх үед амархан муухай болох гээд байдаг. Энэ үед танд хормогчноос өөр хамгаалалт олдохгүй шүү дээ.

Өөртөө таарсан бас дэгжин загвараар хийгээд үзээрэй. Дараагийн удаа үүнээс илүү гоёыг хийе гэж бодоод байгаа

Үйл тань уран Үйлчин та ганган байг:))

Нээрээ блогынхоо 1000 дахь сэтгэгдэлийн эзэндээ юу өгөхөө бодоод олчихсон. Удахгүй үзүүлнээ.

Гал тогоо ба оёхуй. Цуврал 1

http://tsetsgeehandmade.blog.gogo.mn — Thu, 16 Feb 2012 16:55:16 ULAT

Охид бүсгүйчүүд маань галын өрөөнийхөө тохижилт болон бусад зүйлсд ихээхэн анхаарал тавьдаг шүү дээ. Харин миний хувьд галын өрөө болон хоолны ширээнийхээ хэрэгсэлээ оёж урлаад саяхан дуусгалаа. Үүнийгээ цуврал байдлаар бичлэг болгож оруулж байна. Уг нь аль намар эхэлж байсан болохоор өнгө болон хээ нь намрыг санагдуулам байж магадгүй. Удахгүй сар шинэ болно шинэхэн бүтээлээрээ галын өрөөгөө чимнээ. Гэрийн чинь зүйлс гэрт чинь хийгдсэн байвал гоё л биз дээ. Намайг дагаад хийгээрэй.

Тогооны бариул

Эмээ маань тогооны бариулаа хэд хэдээр нь хийгээд тавьчихдаг байж билээ. Зузаан бор эсгийг дөрвөлжилж хайчлаад нэг талд нь хулдаас бариад оёчихдог байсан. Сүүлийн үед тогооны бариул гэхээсээ илүү гал тогооны бээлийг ихэнхдээ орлуулан хэрэглэж байгаа байх. Харин миний хийсэн энэ жийргэвч маань бээлий гэхээсээ илүү бариултай төстэй болсон.

Хийхэд ч амархан жийрэглэх талаа зузаан дотроор доторлоод гадна хэсгийг нь дан даавуугаар оёно.

Авахад ойр газар өлгөөд тавьчихаарай.

Ээждээ эсвэл найздаа бэлэг болгож хийж өгсөн ч болно шүү.

Үйл уран байг.

Удахгүй блогын маань сэтгэгдэл нь 1000 хүрэх гэж байгаа 1000 дахь сэтгэгдэлийн эзнээ бяцхан урамшуулая гэж бодоод байгаа. Юу өгөх вэ гээд л бодоод байна та нар юу авмаар байна:P

Хайр урлах өдрүүд

http://tsetsgeehandmade.blog.gogo.mn — Sun, 12 Feb 2012 22:03:46 ULAT

Хайрын баяр болох гээд хайртай хүмүүсээ баярлуулах өдрөө хүлээж ядан сууна уу. Заавал 14-ны өдрийг хүртэл хүлээх хэрэггүй. Хайрын өдрөө угтаж хайрын төлөөлөл болох зүйлсийг өдөр бүр хайртай хүмүүстэйгээ хамтдаа хийж бас урлаарай. Хайрын баяр нь зөвхөн дурлалт хосуудынх гэж явцууралгүйгээр өөрийнхөө хайртай гэсэн бүх хүмүүсээ баярлуулдаг тэдэндээ ямар их хайртайгаа илэрхийлдэг тийм өдөр гэж би ойлгодог. Ингээд 14-г хүртэл өдөр бүр хайртай хүмүүсээ жаахан ч гэсэн баярлуулаарай.

Жич: Өнөөдөр хийсэн зүйлс,,,

Өглөөний цайны ширээн дээрх өндөг талх хоёроо хайраар амтал.

Зүгээр биш зүрхэн хэлбэртэй алим ид.

Хүүхдүүдтэйгээ зүрхэн хэлбэрийн зүйлс урла.

Ээж хүү хоёр нийлж хийсэн юм. Дүүдээ зориулсан хайрын бэлэг:) Цаас соруул хоёроор хийсэн хүзүүний зүүлт.

Хүүгийн маань өмдний өвдөг байнга л урагдчихдаг юм. Өнөөдөр нэг өмдийг нь нөхөхдөө зүрхэн хэлбэртэй нөхөөс тавчихлаа.

Харин яг одоо манай гэрийнхэн цаасаар зүрх хайчилж гэрээ чимж байна. Та ч гэсэн хайртай хүмүүстэйгээ хамт гэрээ зүрхээр бас хайраараа чимээрэй.

Хүн өөрөө хайрын ургамал Хайр өөрөө сэтгэлийн урмаар тэжээгдэж тэтгэгддэг юм.... гэж миний дуртай нэг дуучин дуулдагыг саналаа.

Тиймээ та бол хайрыг бүтээгч.

Цахилгаан Маквин ''Би бол хурд'' 4-р уралдаан

http://tsetsgeehandmade.blog.gogo.mn — Tue, 31 Jan 2012 12:19:39 ULAT

Энэ сард олон төрсөн өдөр болдог ч миний хүүгийн төрсөн өдөр хамгийн гоё бас урд урдынхаасаа илүү сайхан болсон. Хүү маань Цахилгаан Маквины улаан фэн болоод удаж байгаа болохоор төрсөн өдрийг нь түүгээр нь хийсэн юм. Зав бага дээрээс нь аавынх нь хүсэлтээр гэртээ хийлгүй хамаатныхаа шинэхэн нээгдсэн рестронд баяраа тэмдэглэсэн. Ээж хүү хоёр бол гэртээ л хийх хүсэлтэй байлаа. Гэрээ чимэглэх дуртай болохоор бас яаж зүгээр байхав гээд зарим юмнуудыг нь авчираад нэг хоёрыг энд тэнд зүүчихсээн.

Өмнөх орой нь очиж ресторанаа чимэглэсэн. Хана болон таазны чимэглэлүүдийг сонирхоорой.

Шоо хээтэй даавуу хайж хамаг дэлгүүрийг нүхэлсэн шүү. Арай гэж төстэй даавуу олсон. Манай улс хэзээ нэг хүсэж хайсан зүйлээ төвөггүй олдог болох болоо.

Хүүхдүүдэд зориулсан амттаны ширээ тусд нь зассан. Хүмүүс ингэж их засдаг юм билээ. Цаашдаа ийм ширээг баяр болгоноор засаж байна аа. Энэ ширээний бүх чимэглэлийг өөрөө хийсэн. Ханын чимэглэл тэр том улаан машин, бяцхан дарцагууд гээд л,,,

Энэ бол төрсөн өдрийн бялуу. Манай хэвлэгчийн хор дуусаж байсан тул Маквин тод улаан хэвлэгдээгүй буруу нь бялууны өнгийг өөр болоход хүргэсэн байна лээ. Уг нь машин нь улаан өнгөтэй шүү гэж захиалга авч байсан хүнд нь олон удаа хэлсэн дээ. Батбайгалынхан маань энэ жил жаахан будилсан шүү. Гэхдээ яахав ганц хүссэнээр хийж өгдөг газар шүү дээ. Ямар ч зураг үзүүлэхэд оролдоё, ойртуулая гэж хэлнэ. Бусад нь бол шууд л чадахгүй, хийхгүй гэж хэлдэгийн.

Хүүхдүүддээ тусд нь ингэж ширээ засаж өгсөн. Бүх юм нь нөгөө айхтар Маквин чинь шүү дээ.

Ширээний бүтээлэгнээс эхлээд нүдэндээ зүүдэг маск, бүрээ, шүгэл, аяга, таваг, амны алчуур гээд л эрхэм Маквингүй юм алга даа.

''HSF'' noodle bar (Healty Safety Foods)гэсэн нэр бүхий энэ ресторанд та азийн орнуудын хамгийн амттай гоймонтой хоолуудыг нэг дороос амтархан идэх боломжтойн дээр тогооч нь энэ чиглэлээрээ Англи улсад бараг 10-аад жил ажилсан туршлагатай хоолыг амттай бас хурдан хийдгээрээ үнэхээр чадвартай санагдсан. Хүүхэд том хүн нийлсэн 40-д хүнийг хоолоор уяагүй бас орц ихтэй хоолууд нь амттай, чанартай байсан болохоор ирсэн хүмүүс нь дараа орох газар нэгээр нэмэгдлээ гэж байна лээ. Хаяг нь: Төмөр замын удирдах газрын яг хойно Great House барилгын 2 давхарт. Утас: 98106858

Харин энэ томчуудынх

Хүүдээ зориулж хийсэн төрсөн өдрийн малгай. "Ээж, ээж энэ 4-н тоо нь зам шиг юм байна" гэж харангуутаа хэлсийн шдээ. Мундаг хүү шүү.

Цахилгааны дүрс дээр нэрнийх нь эхний үсэгтэй, Би бол хурд гэсэн бичигтэй нөмрөг хийж өгсөн.

Хүүд маань төрсөн өдөр нь их таалагдсан. Төрсөн өдрийн бэлэгнүүдэд хүртэл алдарт Маквин орсон зүйлс байсан шүү.

Хонгорхон үрдээ төрсөн өдрийн мэнд хүргэе! Аан бас

"Намайг төрүүлсэн хайртай ээждээ бүүр их баярлалаа."

HAPPY BIRTHDAY TO ME!

Төрсөн өдрийн урилга

http://tsetsgeehandmade.blog.gogo.mn — Sun, 29 Jan 2012 12:27:22 ULAT

Хүүгийн маань төрсөн өдөр саяхан болж өнгөрлөө. Төрсөн өдрөө дуртай Цахилгаан Маквин-раа хийсэн. Ер нь ихэнх зүйлсийг нь гараар хийдэг болохоор энэ удаад ажлаа хөнгөвчилөхийг хүсээд бэлэн зүйлс авсан боловч нэг мэдсэн зөндөө юм хийчихсэн байна лээ. Хүүхдийнхээ төрсөн өдөрт ирж байгаа хүүхдүүдэд урилга өгөх нь гоё шүү дээ. Төрсөн өдрийн урилга нь энэ байна.

Харин урилга нь дугтуйгүй байсан болохоор би дугтуй нэмж хийсэн юм. Та нартаа санаа авах үүднээс хэрэг болж магадгүй хэмээн дугтуйг хийсэн заавраа оруулая гэж бодлоо.

Дугтуй маань дотор нь байгаа урилгатаа эсвэл тухайн баяртаа тохирсон өнгө төрхтэй байх нь тодорхой. Цахилгаан Маквины голлох өнгүүд нь хар цагаан шоо хээ болон улаан шарын хослолоор илэрхийлэгддэг. Тиймээс дугтуйны цаасаа хар цагаан шоо хээгээр хийсэн.

Үүнийг хэвлэгчээр А4 цаасан дээр буулгаад цаасаа урилганыхаа хэмжээнд тохируулан 2 хувааж зүссэн.

Ингээд цаасаа голоор нь нугалаад нугалсан талын нэг талыг хоёр захаас нь өөлж хайчилаад нөгөө талын илүү хэсгийг дотогш нугална. Зургыг сайн хараарай. Нугалсан ирмэг дээгүүрээ цавуу түрхээд дугтуйгаа наана. Илүү гарч байгаа цаасан дээр урих хүүхдийн нэрийг бичээд цааш нугалаарай. Ингэх нь олон урилга дотроос тухайн хүүхдийн урилгыг олоход амар байх болно.

Одоо дугтуйгаа чимэглэх үлдлээ. Хэвлэгчээрээ цахилгаан Маквиныг жижгээр олныг хэвлэнэ. Хатуувтар шар өнгийн цаасаар цахилгаан хайчилна. Тэдгээрийгээ иймэрхүү байдлаар дээр нь наагаарай.

Ингээд таны хийсэн дугтуй урилганыхаа хамт эзэндээ хүрэхэд бэлэн боллоо.

Таныг тун удахгүй ЦАХИЛГААН МАКВИНТАЙ хамт тэмдэглэсэн төрсөн өдрийн бичлэгээр уулзахыг урьж байна.

Баяр баярын дундаас төрсөн өдрийн баяр хамгийн сайхан нь.